Дзагурти Дигорхан

Нӕ бундортӕ.

Ци 'хсидзгон ӕй алкӕмӕн ни
Ӕ хӕдзарӕ, ӕ бундор!
Алли хузи - нӕ ӕнцойнӕ,
Еунӕг хузи - нӕ амонд...

Цал фӕлтӕри ӕ къӕсӕрбӕл
Царди тонхи рацӕуй,
Цал артдзӕсти еунӕг монӕй
Дун - дуйнемӕ 'сфӕлдесуй!..

Ӕ гъӕрмости нӕ нецитӕ
Къобор уайтӕмӕ хатуй,
Ӕ фарнӕй нӕ цитгин кӕнуй,
Ӕ хъуатӕй нӕ ӕрцаруй!

Цӕгиндзитӕ - ӕ нӕлӕстӕг,
Уоди зӕнхӕ - силгоймаг,
Тупп-тупп кӕнгӕ минкъий къӕхтӕ -
Ӕ дзилагӕ, ӕ царддаг!

Кӕрдӕг дӕбӕл ма ӕрзайӕд,
Лӕгӕй федар нин куд уай,
Уарзти ауӕй ӕностӕмӕ
Бедауигонд куд цӕуай!

Цауд фӕлгонцӕ.

Тъинккгай тӕдзӕн,
бонуоддӕрти ӕрсергӕй,
Кумӕ, цӕмӕ,
нӕхе тӕппӕн не 'ссергӕй.

Фӕрӕтӕй цӕф
егъау рӕсугъд бӕласау,
Кӕций ӕнхӕ
дон ӕ бунмӕ фӕллассӕй...

Рӕстӕг фӕлвард
ӕ асӕги тузмӕги,
Нивонд нӕ цард
хӕрди ӕма урдуги.

Дессагӕн нин
фӕлмӕ фестун ци 'селдзӕй,
Уӕлдӕр уйнадӕ
цӕмӕй нин баййевдзӕй?..

Ӕнайӕнойти иуазӕггадӕ.

Уадӕхсийнӕ ӕ финкесӕн
Нӕ рауорӕмдта къохи,
Фӕффесиммӕй ӕ дзӕппуйӕй,
Ниццӕйхӕлеуӕй ӕрвти!

Райивулдӕй туйрай хуӕрзтӕф,
Сӕ хъурманлӕхъ исгъӕр ӕй!
Ӕвӕстеуӕттӕ, хуӕддзотӕ
Гъазтидзаг ӕрбамбурдӕй!

Дӕллаг комӕй уӕллаг коммӕ -
Бидаркити синк - синккӕй,
Еу иннемӕй къӕрццарӕзтдӕр,
Сӕ фӕндур дӕр сӕ хӕццӕ'й!

Медгъӕу ихӕс хӕлӕфгӕнгӕй
Федгӕ некӕддӕр фӕууй,
Уомӕ гӕсгӕ ӕ синхаги
Ка куд зонуй - нимайуй!

Цӕй, зӕнхонтӕ, уӕларвонтӕн
Уллу талас искӕнтӕ,
Ӕнгъӕлдзау уӕмӕ куд уонцӕ,
Куд нимайонцӕ бӕнттӕ!

Рацӕййивазӕ, Хорческа,
Хори кизгӕ, дӕ фӕндур!
Арвӕй зӕнхи 'хсӕн гупп кӕнгӕ
Ниццӕйазӕлӕд дур-дур!..

Лимӕнтӕ.

Тикис ӕмӕ мисти цардӕй
Маке цӕрӕд, фӕззӕгъӕн,
Мӕнӕн ба мӕ минкъий мистӕ
Ӕйӕй мӕ устур лимӕн!

Нӕ урундухъ - дууей фагӕ,
Еу тӕбӕгъӕй фӕххуӕрӕн,
Бонсауизӕрмӕ дууемӕй
Нӕ гъӕзттити фӕгъгъазӕн!

Е - мистикъи, ӕз - зӕрдикъи,
Кӕрӕдзей ӕгӕр уарзӕн,
Ӕхсӕвгӕйттӕ уӕлзӕнхитӕ
Нӕ медфунти фӕттӕхӕн!

Дууӕ базури еу уодӕн,
Уонӕй алке - ӕнӕнгас,
Нӕ ӕнзӕрдӕн, лимӕйнадӕн
Ейӕ ӕй уӕлдай агъаз!

Хорой.

Куд рӕсугъд дӕ, куд, чиуали!
Мудӕмхӕццӕ хори цъӕпп!
Дессаг хуаллаг, дессаг цӕллаг,
Алцӕмӕн дӕр нин бӕззис!

Ӕдонуг уайтагъд фӕссӕтти,
Дӕ адгинӕй ӕфсадис,
Зӕнай астӕу - минкъий хоруац,
Уайтагъд ӕрбарӕгъӕд уис!

Сӕрдӕн е 'нӕмӕнг ӕвдесӕн,
Ӕргомзӕрдӕ фарни тӕпп,
Ци зӕнхӕ дӕ гъомбӕл кӕнуй, -
Ӕностӕмӕ нин цӕрӕд!

Ӕхсинцъбунӕй, дзӕхӕрайӕй,
Уӕ хуарзӕнхӕ ахедӕд,
Уӕ берекет, уӕ мийнасӕ
Алкӕд табедзӕ кӕнӕд!

Зӕрди уайтӕ.

Денгиз, денгиз, райдзаст зӕрдӕ!
Дӕ уӕрӕхти дин ӕрвтӕ
Бонизӕрмӕ, ӕнӕфсесӕй,
Ерхӕфсунцӕ сӕ ӕнхӕ...

Кӕфдзаути сӕрбехъулӕнттӕй
Уӕлдӕф цӕуй цъӕппӕхснад,
Мӕнӕн ба дӕ зӕнхӕй идард
Уадзгӕ цӕуй мӕ фӕллад!

Нӕ еу кӕнунцӕ фӕндӕгтӕ
Кӕрӕдземӕ нин некуд,
Раст, ӕзинӕ 'ма абони -
Ӕнгъӕлдзауӕн ӕ рӕдуд!..

Дони 'ртӕхи ку бауайун, -
Мӕ цӕститӕбӕл уайис,
Раст, цума, дадзинти гъазис,
Мӕ гъудийӕй не 'фтуйис!

Денгиз, денгиз, дӕ хъуритӕ
Уодӕн хӕссунцӕ ӕнцон!
Фалӕ, хуӕнхти айнӕг фӕрсти
Ба - мӕ ауӕ 'ма мӕ мон!..


***

Изӕрсарӕй, ӕрхӕндӕги,
Уодӕн ести имискӕй,
Рагеу - багеу, рагӕлдз - багӕлдз,-
Ӕхецӕн дӕр нӕбал ӕй!

Цӕстӕ, естӕбӕл фӕццӕфсгӕй,
Цитӕ, цо, ӕримисуй,
Нӕ маркафӕн ӕ куройнӕ
Уодциринӕй лӕхоруй!..

Геггуз дӕр ӕй не 'схондзӕнӕ,
Зунди уагӕ дӕр идзаст,
Февналунмӕ, ракӕнунмӕ,
Алцӕмӕ дӕр тулаваст!

Фалӕ, уӕддӕр, мӕйнӕуӕги
Цидӕр тӕлмӕ ӕрдаруй,
Ӕррабӕгъай мизезийӕй
Цидӕр имӕ багъаруй!..

Аци силӕн аци мӕйӕ
Уогӕ кӕнун ци гъавуй,
Ӕ уӕлсӕргъӕ идзагдар ӕй,
Ӕви гендзийӕй лӕууй?!

Ести хузи боницъӕхӕн
Рохсалистӕ истӕлфӕд ,
Ӕхе кеми кӕдмӕ ма йӕй,
Ести бӕлах ма 'рхӕссӕд!..

Ӕнгъӕлдзаути бонуоддӕртӕ.

Ӕнзтӕн сӕ къӕдзелӕ
ма зиннуй,
Лӕгтӕн сӕ кой дӕр
нӕбал ӕй,
Гиггитӕн сӕ зӕрдитӕ -
гьари,
Кӕд миййаг,
ци ба нӕ фӕууй!..
Фалдзости румпӕг
цума тахтӕй,
Ӕви, саринцха си
бауадӕй,
Кӕми 'нцӕ ирагтӕ,
уӕгъдитӕ,
Ке бӕх си кӕми
ниммардӕй?..
Хӕрнӕгъ, мизихъаг,
татурустӕ, -
Еу хъадамагонд
ӕмбурдӕй!..
Алфамбулай марг
ниппурфкиндӕй,
Ци хузи бӕлах
ӕрцудӕй?..
Нӕннӕ, уотӕ ба
нӕ фӕууодзӕй,-
Адзали разӕй дӕр -
мадзал!
Сирдбадӕни ӕд
дурицъухтӕ,
Киндздзонтау,
лӕппӕгтӕ ӕнгъӕлдзау!..

Сӕумон уацар.

Минкъий ма,
удта уацари хаудтӕн!
Еу удзести бӕрцӕ
ма гъудӕй...
Мӕ сӕлхӕртӕн
сӕ гъазгӕ думгитӕй
Ӕнӕхай кодтайнӕ,
уӕдӕдӕй!
Мӕ рӕсугьд сӕр
гъудитӕ кӕнунмӕ
Хъӕбӕр ӕвгъау, -
цурд ку 'рзӕронд уа!..
Мӕ ӕвзонги хор
ку ранигула,
Мӕ бӕсти ма
цийнӕ ка кӕна?..
Аци цард мӕтитӕн -
ӕгӕр ӕвгъау,
Сӕри ристӕй
пайдатӕ нӕййес!
Уомӕ гӕскӕ,
рохсбӕл рохс
ӕфтаугӕй,
Ме 'нӕмӕтӕй
царӕд ӕ ес - бес!..

Кӕддӕри хуасгӕрцӕ.

Фӕгъгъӕр кодта мӕйӕ
фӕллад цъеуӕй,
Рарӕхцунмӕ ӕхсӕрбуни
ӕрбадтӕй.
Сӕумицъӕхӕй фӕсгъӕу
тинс ӕртӕхбӕл
Мӕ фидӕн ӕ цӕвӕг
низзаруй.
Хедӕйдзаг ци хӕдонӕ,
ци ходӕ,
Хӕцъӕфгун, бӕзӕрхуг,
толдзийау,
'Ма бӕзгин, рӕгъӕд
берӕгъзӕнгхузӕй
Ӕ тӕрнихбӕл - зӕлдаг
гоцора.
Ӕ цӕвӕг уозеруй
коммӕгӕсӕй,
Нӕлгоймаги хъисмӕтбӕл
заруй,
Фӕскъохгонд дзехъендахъ
гъӕдгӕрони
Мур - мурӕй нимайуй
хорискаст.
Исрӕуӕхссӕй зӕрдӕ,
ӕримисгӕй,
Сулӕг мегъӕ,
нӕлхъӕнтау бӕзгин,
Зумели мудӕй
пурфгонд цӕвӕгхуасӕ...
'Ма мӕ фидӕ -
ӕригон ӕма кондгин...