КЪИБИРТИ Амурхан
ИГУÆРДÆНИ
Хуасгæрци сæумигон
Сикъей хузæн – дæ тахт.
Дæ зæнгитæ – игон,
Тайуй сæбæл æртæх.
Рæудунгæ дæ соруй,
Сцæрдæг уй дæ фæсте.
Хор дин ходæг дзоруй,
Арвбæл дæ нон финст е…
Хæстæгмæ дæ стæфун
Ниддæн гъæдбуни гъос.
Фур цийнæй æстъæлфун,
Мæ зæрди къуми – рохс.
Деденгути денгиз
Кæнуй дæбæл цæхъал.
Фергъæвуй мæ де ʽнгас, –
Дæн æнæбæрцæ хъал!..
________
15.01.2006
ДЗАТТОЙ ТУППУР*
Уарунгарæ,мегъдалингæ,
Арв æ саутæ нæ есуй.
Саг лæхъуæнæн уазал ингæн
Æносон хуссæн исуй.
Нæуæг ностæн – тунд æ ростæ,
Таруг арв ибæл уæзуй.
Нæуæг ностæ – хъæбæр бостæ, –
Ревæд авдæнæ уозуй…
Мæгурбæнттæ,мæгурбæнттæ,
Маст хуæруй нæ æнæвгъау.
Ци стур иссæй нæ уæлмæрдтæ,
Ци минкъий æрцæй нæ гъæу!
__________
*Дзаттой туппур – Сурх-Дигори астæуккаг
уæлмæрдти нон
ЦАРД
2
Æй цард
Искæсæ ма никкæсæ, –
Арвбæл ферттевуй хор,
Тæмæнтæ калгæ ирд;
Фатау цъузгæ тæхуй,тæхуй…
Кæсæ,
Уæлæрвтæмæ фæлгæсæ, –
Æваст ци растæфай,
Ци фергъæва дæ цæстæ,
Ейæ арвæй уодзæй дин хай.
_________
УÆРЦЦÆ ДÆН…
Бор дзугъур уæрццæ дæн;
Цъук-цъæрæк,цъук-цъæрæк.
Бæдæлтти хæццæ дæн, –
Мæнæути хъал цæрæг.
Тæмæси рæстæг æй! –
Цъæх сæрдæ ʽй,цъæх сæрдæ ʽ й.
Низзарун хæстæгæй,
Низзарун идардæй.
Уæ биццеу,цурд биццеу, –
Фæммæ кæнæ тæрсун,
(Дæу хезуй цъибирт цъеу), –
Мæхе ди римæхсун:
Æз мæнæ ами дæн, –
Илæ-лай,цъук-цъæрæк.
Æз уæртæ уоми дæн, –
Илæ-лай,уо цæрдæг!..
_________
* * *
Æгас ма йан æви рамардан?
Кæд нурма æнивæрд мæрдтæ ан?
Кенæдта,кæд,Нарти кæнтæй ан, –
Уæлæбæл уогæ дæр нæ адтан.
Нæ фæндаг цъæх айнæгмæ стухстæй,
Æ сикъа расастæй хорæн дæр.
Ма нæбæл рæфтигон рахустæй,
Минæг ма æстæфæн хорæндарг…
Фæццудан цидæр рохсмæ бæлгæ,
Курмæгæй кумæдæр ниббал ан.
Нæ ракодтан,æвæдзи,мæлгæ,
Фал,оххай,æгас дæр нæбал ан!
___________
03.07.2019
3
ХАЛÆНТТÆ
Нæ йан дзенети мæргътæ мах, –
Нæййес зæрийнæ сес
