ГАДАТИ ЛАЗАР

ИСКУРДИАДÆ

Гъæдрæбуни

Æцæг цау

 

Æнæдон адаги хонсарварс лæмбунæг карст. Хонсари уæлбилæ, æндзæри ба нæуæг карст хуаси ласæг. Ласæгбæл бакъолæ кодтон сагойнæ ‘ма куствæлладæй мæхе æруагътон хуаси рæбун. Нæуæг соргонд, хорæй æфсæст кæрдæги адгин тæф æхцæуæн æмбæлд кæнуй уолæфæнтæбæл. Мæ бакомкоммæ, цæгати сау гъæди бæлæстæ фахсбæл уæлæмæ уайунцæ кæрæдзей сорæгау.

Тар гъæдæ ниппурх æй кæмти, раст Сурхи бæрзонди уæнгæ. Æваст æрталингæ ‘й, ‘ма гъæдæ æмхузон тар ниццæй, еугæй бæлæстæ нæбæл зиннунцæ.

Гъæдæй игъусуй аллихузон удзæлтæ. Цъеути цъæбæр-цъубур игъусуй хæстæгæй; сæхе æхсæвейуатмæ цæттæ кæнунцæ.

Бунтон æрталингæй ‘й, ‘ма листæг удзæли астæуæй æрбайгъустæй æнæбæрæг маргъи тæрегъæддаг гъæр, раст цума æгас мæргъти рист дæр уой реуи æй, уотæ.

Ниссабур уй, уæдта бабæй нæуæгæй æрбайгъусуй рист уоди гъæрзунау: у-у-у! У-у-у!

Сабийæй хъæбæр фæттарсæн, фиццаг æй ку фегъустон, уæд. Æнаффони гъæдæй æздахтан ме ‘нсувæри хæццæ, ‘ма мин е радзурдта, нæ фидæй ци фегъуста, уой.

Медхонх мæгур мадæ ‘ма фидæн адтæй алæмæти рæсугъд кизгæ. Дигоргоммæ æрбацудæй тухгæнæг кæсгон æлдар ‘ма кизги рахаста Кæсæгмæ. Ниййергути кæун æма кизги дзинæзунмæ хуæнхтæ дæр ма барезионцæ. Æлдар æма æ фæсдзæуинттæ сау гъæди æрлæудтæнцæ уолæфунмæ. Кизгæ æвеппайди ралигъдæй, ‘ма гъæди цæй бæрцæ фæддогъ кодтайдæ, ка ‘й зонуй… Æ даргъ рæсугъд дзиккотæ бæндзуггæй изадæнцæ бæлæсти къалеутæбæл. Æ уæле дарæс нæбал байзадæй.

Еу афони хуæрзхæстæгæй фегъустæ бæхти хуррут æма адæни æзгули. Æлдари фæсдзæуинттæ адтæнцæ етæ, зилдæнцæ кизги агорæг. Æ фур æнæбонæй æ уæрагисæртæбæл æрхаудтæй кизгæ ‘ма искувта: «Хуцау, маргъ мæ фестун кæнæ». Æ тæрегъæд арвмæ фегъустæй, ‘ма фестадæй маргъ.

Гъе уæдæй курмæ дзиназуй.

Æ тæрегъæддаг гъæр тар гъæди ниппурх уй, иннæ удзæлтæ ниссабур унцæ.

Æфхуæрд уоди гъæрзун æма тæрегъæддаг катай тар гъæдæй фæххецæн уй ‘ма ниффардæг уй кæмтти, къæдзæхæй къæдзæхмæ æсхъеугæ.

Дзæвгарæ рæстæг ма игъустон маргъи гъæрмæ, уæдта æнкъардæй рараст дæн гъæу æрдæмæ. Мæ зæрдæбæл æмбалдæй æфхуæрд уоди тæрегъæд.