Сагети Рамазан
Мӕ имисуйнӕгтæй
Аци хабар раги адтӕй, ӕз ма мӕхуӕдӕг ӕригон лæппо ку адтӕн, уӕд. Еци дзаманти адӕммӕ фестӕгӕй цӕун пиртт дӕр нæ кастӕй. Мӕнӕ Лескени гъӕуӕй Чиколамӕ бауайӕ ӕма еци бон фӕстӕмӕ фездӕхӕ, е нимади дӕр н'адтӕй. Нури хузӕн, мӕнæ автобустӕ 'ма трамвайти еу ӕрлӕууӕнӕй иннемӕ сӕдӕ метри фестӕгӕй куд некебал цӕуй, ӕд минкъий, ӕд устур - уотӕ нæ адтан мах.
Гъе ӕма еу бонӕ Чиколайӕй нӕхемӕ, Лескенмӕ, фӕстӕмæ куд раздахтӕн, уотемӕй гъӕугӕрон фембалдтӕн чиколайаг Кертанти Тъӕхирбӕл. Уӕди дзаманти е адтӕй ӕригон поэт. Адтан зонгитӕ. Кӕрӕдзебӕл ниццийнитӕ ан. Уӕд адӕм кӕрӕдзей берæ уарзтонцӕ, кӕрӕдземӕн устур аргъ кодтонцӕ ӕма син кӕрӕдзей уиндӕ уидӕ ӕхцӕуӕн. Ра-салан-келантӕ кодтан, уӕдта мин игъӕлдзӕгӕй уотӕ зӕгъуй:
- Мӕнмӕ ес Малити Геуӕргий киунугӕ "Ирӕф". Ез уобӕл десдӕр бакодтон, кӕми ин адтӕй, кӕми'й иссердта, зӕгъгӕ уӕдта æй бафарстон:
- Нур ӕй ӕз куд фӕууинон, кутемӕй æй бакӕсон
- Рацо, раздӕхӕ фӕстӕмӕ ӕма'й райсӕ. Æрмӕст куд нӕ фесӕфа, ма'й ку бакӕсай, уӕд мин ӕй куд ӕрбахӕссай, уотӕ. Æз хъӕбӕр бацийнӕ кодтон. Тъӕхири еци дзуапп мӕнӕн адтӕй ӕнæнгъӕлтӕбӕл.
Раздахтӕн фӕстӕмӕ ӕ хӕццӕ сӕхемӕ. Бахъӕрдтан сӕ хӕдзарӕмӕ. Æз медӕгмӕ цӕунмӕ дӕр нӕ гъавтон, зӕгъун, тагъддӕр ма киунугӕбӕл ку фӕххуӕст уинӕ, ӕндӕр мӕ неци гъæуй, зӕгъгӕ. Фал мӕ нӕ ниууагъта. Хуарз мӕ исиуазӕг кодта, уӕдта мин рахаста киунугӕ "Ирӕф". Æз ӕй мӕ рони рацавтон ма цӕунбӕл фӕдтӕн. Нӕуӕгӕй Чиколай гъӕугӕронмӕ куддӕр рахъӕрдтӕн, уотӕ киунугӕмӕ кӕсун райдӕдтон. Æма ин ӕ уиндӕй не'фсастӕн.
Кӕд Малити Геуӕргийӕн ӕ ӕмдзӕвгитӕ 'ма кадӕнгитӕй уартӕ тугъди размӕ, биццеу уогӕй, еугӕйттӕ бакастӕн, уӕддӕр ин ӕ киунугӕ ба фиццаг хатт фӕууидтон гъе уӕд, ӕма'йбӕл устур дес кодтон. Дес уомӕн кодтон, ӕма хуарз зудтон, Малити Геуӕргийӕн, уӕди уӕнгӕ кӕд берӕ финститӕ нӕма бакастӕн, уӕддӕр ӕ еугур уадзимистӕ дӕр хъӕбӕр хуарз ке адтӕнцӕ, хъӕбӕр дӕсни финст ке адтӕнцӕ, дигорон ӕвзагбӕл син ӕмбал ке нæ адтӕй, гъе уой.
Рагӕй дӕр зудтон, Геуӕрги революций тохти активон архайӕг ке адтӕй, керминистти раззагдӕртӕй ке адтӕй, парти "Кермени" аразгутӕн сӕ фиццӕгтӕй ке адтӕй, гъе уони.
Гъе ӕма киунуги фиццаг тъаффӕ рафӕлдахтон ӕма гургъахъ надбӕл цӕугӕ - цӕугӕй кӕсунтӕ ниййагайдтон.
Гургъахъ надбӕл ба зӕгъун ӕма уӕди рӕстӕги фӕндӕгтӕ нури хузӕн раст, лигъз ӕма асфальт н'адтӕнцӕ.
Æстӕмӕй-астмӕ размӕ ракӕсинӕ, ма еске мӕ бакомкоммӕ ӕрбацӕуй, зӕгъгӕ, уӕд мӕ кӕсун фӕссабурдӕр кӕнинӕ, кенӕ бунтондӕр фӕууадзинӕ. Фӕндаггон ку райевгъуидӕ, уӕдта бабӕй нӕуӕгӕй кӕсун райдаинӕ еци гъӕрӕй. Гъӕрӕй кӕсун ба минкъий биццеуӕй фӕстӕмӕ дӕр берӕ уарзтон. Бауолӕфинӕ ӕрмӕстдӕр Хӕзнидони гъӕунгти цӕугӕй, уӕдта Толдзгуни.
Гъе уотемӕйти Толдзгуни гъӕуӕй нӕхе ӕхсӕнмӕ ку бахъӕрдтӕн, уӕд киунугӕ каст фӕдтӕн. Еунӕг дзурд дӕр си нӕбал ниууагътон ӕнӕ бакӕсгӕй. Рӕстӕг мӕбӕл куд раевгъудӕй, уой нӕ балӕдӕрдтӕн.
Дуккаг бон ӕрбацудтӕн скъоламӕ. Кустон ахургӕнӕгӕй.
Скъолай нӕмӕ адтӕй литературон къуар. Скъоладзаутӕ си хъӕбӕр активонӕй архайдтонцӕ, уӕлдайдӕр хестӕр кълӕстӕ. Уӕди рӕстӕги скъолайаг аллихузон къуӕрттӕ - кружоктӕ сӕ хонионцӕ, уони аразунбӕл, уонӕми архайунбӕл ахургӕнгутӕ дӕр ӕма скъоладзаутӕ дӕр зӕрдиуагӕй кустонцӕ.
Мӕ Чиколамӕ фӕццуди хабар син ракодтон. Ӕма мӕхе зӕрди ка адтӕй, уой мин скъоладзаутӕ дӕр, корӕгау, загътонцӕ. Гъома, киунугӕ син куд бакастайнӕ, уотӕ. Ӕма райдӕдтон кӕсун. Уӕд Лескени скъолай кълӕстӕ адтӕнцӕ устур. Равзурстан син сӕ тӕккӕ устурдӕри. Пъартӕбӕл бадтӕнцӕ цалдӕргӕйттӕй. Иннӕ кълӕстӕй дӕр ма ӕрбахастонцӕ къелатӕ ӕма устур къласи къах байвӕрӕн нӕбал адтӕй. Ӕрбацудӕнцӕ игъосунмӕ ахургӕнгутӕй дӕр еу къуарӕй.
Кӕд ӕнӕуой урокки, кӕрӕй-кӕронмӕ фӕббадгӕй, бафӕллаионцӕ, уӕд нур ба дууӕ уроккемӕй дӕр берӕ фулдӕр рӕстӕги скъоладзаутӕй змӕлгӕ дӕр неке искодта. Хъӕбӕр дес кӕнгӕй, кастӕнцӕ ӕма игъустонцӕ киунуги финститӕмӕ. Ӕма куд нӕма игъустайонцӕ, куд нӕ кодтайонцӕ дес, Геуӕргий "Ирӕфи" ци ӕмбесонди кадӕнгитӕ ӕма ӕмдзӕвгитӕ ес, уæхӕнттæ нӕ еугур дӕр фиццаг хатт фегъустан.
Уӕди рӕстӕги Лескени скъолай ахурдзаутӕй хъӕбӕр беретӕ, скъола каст фӕууогӕй, райдӕдтонцӕ косун колхози ӕма заводти. Еуетӕ фонс берӕ уарзтонцӕ ӕма бацудӕнцӕ фермитӕмӕ косунмӕ. Иннетӕ рӕзӕ ӕма рӕзӕ бӕлӕстӕ берӕ уарзтонцӕ ӕма бацудӕнцӕ дзӕхӕрадони бригадӕмӕ косунмӕ. Ка ба уарзта трактор ӕма машинӕ, кенӕ комбайн, ӕма иссӕнцӕ трактористтӕ, комбайнертӕ ӕма шофертӕ, уӕдта фермити ӕма зӕнхикустгӕнгутӕ. Малити Геуӕргийӕн ӕ устур поэмӕ "Темур - Алсахъ"-и куд финст ес:
- "Æнцӕ зӕрдитӕ муггаггай", зӕгъгӕ, гъе уотӕ. Ка ци куст уарзта, уобӕл ниххуӕстӕй ӕма уоци надбӕл рацудӕй.
Æрмӕст зӕгъун гъӕуй уой, ӕма уӕди рӕстӕги алли куст дӕр, ӕма фӕнди зӕнхи куст уа, еба тракторист - еугурӕй дӕр адтӕнцӕ кадгин, адӕймаг си куста зӕрдиуагӕй.
Лескени гъӕуӕй уӕди скъоладзаутӕй еуӕй-еуетӕ ба рацудӕнцӕ ахури надбӕл ӕма иссӕнцӕ сӕ гъуддаги зундгонд адӕймӕгтӕ.
Аци рауӕн ма мӕ зӕгъун фӕндуй нӕ мадтӕлон ӕвзаги туххӕй. Æз ма аци фарстабӕл финстон къуар анзей размӕ газет "Рӕстдзинад"-и. Раздӕри рӕстӕги скъоладзаутӕ сӕ мадтӕлон ӕвзаг хуарз ке ахур кодтонцӕ ӕма’й дзӕбӕх ке зудтонцӕ, е ӕгириддӕр неци бахъор кодта мах скъолайӕй ка рацудӕй, уони: Исати Мӕхӕмӕти, Хачирти Анзори, Хъаирти Аслӕнбеги, Цорионти Бариси, Цъеути Замӕдини, Сабайти Сулеймани, Тахъазти Харуми, Тахъазти Валерикки, Хути Адӕлбийи, Цорионти Сулемани, Цорионти Резвани ӕма иннӕ уӕхӕн хуарз адӕймӕгти, кӕцитӕ иссӕнцӕ, ка академик, ка наукити доктор, профессор, ка наукити кандидат, доцент, ка уӕлдӕр скъолай кафедри сӕргълӕууӕг.
Хъор нӕ, фал ма син мадтӕлон ӕвзаги хуарз зонун хъӕбӕр фӕййагъаз ӕй царди ӕцӕгдзийнадӕ, царди устур фарстатӕ базонунмӕ, науки бӕрзӕндтӕмӕ исхезунмӕ. Уотӕ адтӕй еугур гъӕути дӕр. Абони ба беретӕ гъуди кӕнунцӕ иннердӕмӕ. Хъӕбӕр хуарз ӕй зонун, еци "беретӕ" рӕдуйгӕ ке кӕнунцӕ, Фесинмӕ зундбӕл хуӕст ке ӕнцӕ.
Нур ба нӕуӕгӕй раздӕхон, раздӕр ци гъуддаги туххӕй дзурд тон, уомӕ. Нӕ литературон къуари активондӕр архайгутӕ Исати Мӕхӕмӕт, Цъеути Замӕдин, Хъаирти Адзӕбе, мах ӕй уотӕ хонианӕ, хӕдзари дӕр ӕй уотӕ худтонцӕ ӕма ӕ зӕрдӕ гъӕуама ма фӕххода, е'цӕг ном ба - Аслӕнбек, Саукуйти Солтан, Сабайти Сулеман, Уанити Бексолтан ӕма берӕ ӕндӕртӕ хъӕбӕр зӕрдиуагӕй архайдтонцӕ, цӕмӕй киунугӕ "Ирӕф" никкидӕр - ма бакӕсонцæ.
Фал еци кинугӕ ӕ хецау Кертанти Тъӕхирӕн фӕстӕмӕ дӕдтун ке гъудӕй, уомӕ гӕсгӕ ба ӕз ӕргъуди кодтон еу гъуддаг: "Ирӕф" къохӕй рафинсун. Ӕма'й фиццагидӕр ӕз мӕхуӕдӕг рафинстон кӕрӕй - кӕронмӕ, ӕхуӕдӕг куд адтӕй, уотӕ, латинаг алфавитӕбæл. Геппӕй уагъд киунугӕ ба фӕххастон ӕма'й равардтон ӕ хецау Тъӕхирӕн.
Мӕнмӕ къохӕй финстӕй ка байзадӕй, уомӕй ба скъоладзаутӕн загътон, сумах дӕр ӕй ардигӕй къохӕй сфинсетӕ. зӕгъгӕ. Æма фӕййагайдтонцӕ кезугай. Архайдтонцӕ, - æз раздӕр фӕууонбӕл. Ӕма'й гъе уотемӕй хъӕбӕр беретӕ рафинстонцӕ. Кӕд сӕ еуӕй-еуетӕ латинаг алфавит зудтонцӕ, уӕддӕр, раст зӕгъун гъӕуй, сӕ фулдӕремӕн ба зин адтӕй латинаг алфавитӕй нури уруссаг алфавитбӕл финсун. Фал син агъаз кодтон. Сӕхуӕдтӕ дӕр мӕ рафӕрсионцӕ, куд раст финсгӕй, уобӕл.
Æз ке рафинстон къохӕй, уомӕй мин си цидӕртӕ фесавдӕй царди хъурдохӕнти бӕллахӕй, фал ӕ фулдӕр ба нур дӕр ӕгас ӕй. Ӕрбайхастон нури журнал "Ирӕфи" редакцимӕ фӕууинунмӕ. Фал ӕй фӕстӕмӕ райсдзӕнӕн. Кӕд Малити Геуӕргий "Ирӕф" нӕуӕг киунугутӕй рацудӕй, уӕддӕр мин мӕ аци къохӕй финст мӕ зӕрдӕмӕ хӕстӕгдӕр ӕй ӕма'й мӕхемӕ дарун ӕма дардзӕнӕн хъазар хӕзнайау.
Еу къуар анзей разӕй Уанити Бисолтан, уӕди рӕстӕги Лескени скъолай ахурдзау, фӕстагмӕ иссӕй юрист, хустӕй Ӕридони сӕйгӕдони уӕззау незӕй, нӕбал исистадӕй, - рохсаг уӕд, ӕма мин ӕй ӕримиста гъе уоми "Ирӕф" къохӕй куд рафинстонцӕ. Ӕримисунцӕ абони дӕр еци гъуддаг.
Еске зӕгъдзӕнӕй, ӕхе ӕстауй, зӕгъгӕ. Нӕ! Ами раппӕлуйнагӕй неци ес, фал мин ӕхцӕуӕн фӕууй, еци дзаманти ӕз не скъолай ӕма гъӕуи цӕргутӕй берети ке базонгӕ кодтон нӕ Дигори хуӕздӕр ӕма устурдӕр поэт Малити Геуӕргий ифӕлдистади хӕццӕ, е. Мӕн хъӕбӕр фӕндуй, абони дӕр, нӕ рагон рӕстӕгау, не скъолати, уӕдта гъӕути цӕрӕг адӕми ӕрдигӕй дӕр айдагъ Малити Геуӕргий нӕ, фал нӕ еугур финсгути, поэтти исфӕлдистадӕмӕ дӕр уӕхӕн цӕстӕнгас дарун ку райдаионцӕ, ку сӕ кӕсионцӕ, ку сӕ уарзионцӕ. Мӕн хъӕбӕр фӕндуй, нӕ мадтӕлон ӕвзагмӕ хуӕздӕр цӕстӕй кӕсун ку райдайанӕ, дигорон ӕвзагбӕл газеттӕ, журналтӕ ӕма киунугутӕ арӕхдӕр ку кӕсианӕ, нӕхе ӕвзагбӕл, минкъийӕй, устурӕй, фулдӕр ку дзорианӕ, лӕмбунӕгдӕр ӕй ку ахур кӕнианӕ, хуӕздӕр ӕй ку зонианӕ... Гъе, мӕн хъӕбӕр фӕндуй.
См.: Ирæф №3, 1995 анз.
